高桥阳一做CEO，南葛挑战日职不是梦！

有朝一日，日职出现一队南葛嘅时候，唔好以为自己睇紧《足球小将》，因为现实生活真係有南葛SC存在，CEO仲係高桥阳一！

呢间由《足球小将》作者高桥阳一营运嘅球会，原本係东京葛饰区球队「葛饰胜鹿（vitóado）」，2013年先至改名南葛SC。今年球迷会会长高桥阳一正式入阁，做埋CEO负责营运，目标当然希望上到日职。

注册资本只有1000万日圆嘅南葛SC，一年使费先至得10万港元左右，目前踢紧业馀嘅东京都联赛1部。假如由日职数落去，大概相等于第7级联赛，想升上最顶级联赛，可以话前路漫漫。但係佢哋属于地区强队，上季攞到冠军，可以参加关东大会，只可惜喺4强止步，上唔到关东2部。　　

今年高桥阳一上任，就对球队大刀阔斧强化，除咗有旧年上任嘅前日本世杯国脚福西崇史做监督，仲有前东京绿茵、神户胜利船门将小针清允兼任球员同教练，更加新签埋前国脚、鹿岛鹿角中场青木刚，有机会再进一步。日前联赛揭幕战，佢哋就和咗明治学院2比2。

南葛SC除咗成年队，又有U12、U15少年队同女子队，好着重培训新生代，佢哋唔只喺2015年就同西乙沙巴度尔合作，不时会派球员去受训，两年前仲同日丙SC相模原，即係前国脚稻本润一加盟果队，结成业务伙伴，发展得好有步骤。

南葛SC球衣

大空翼好醒目

日后南葛SC会唔会出现戴志伟、小志强、麦泰来、林源三？虽然好难，不过所有奇迹都係由梦想开始！